Toringkerk het reeds vir jare ’n betrokkenheid by die Lingelihle Crèche in Mbekweni. Die kerkraad het enkele jare gelede besluit om nog twee klaskamers by die oorvol skooltjie te laat aanbou, maar ons kon dit tot nog toe nie doen nie omdat die grond se transportakte weg was. Al die papierwerk is nou uiteindelik in orde, en ons gaan (DV) hierdie kwartaal die bul by die horings pak, onder die bekwame leiding van Hans van der Sluys. Dis ’n duur onderneming, maar ons glo dat dit ’n saak van die Here is. Sodra ons besonderhede het van die koste, sal ons met syfers en maniere om die werk te befonds, na die gemeente kom.

Pieter Coetzee hou (DV) op Saterdag 11 September om 15:00 ’n blommekuns-demonstrasie in die kerk. Sy tema vanjaar is Josef, in aanloop tot ons kleingroepreeks vir volgende kwartaal, wanneer ons die lewe van Josef (Gen 37-50) gaan volg. Selfs vir ’n mens wat niks van blomme weet nie, is Pieter se blommekuns inspirerend.

Die Libertas-koor kom sing in Toringkerk! Hierdie een is spesiaal vir die musiek-fynproewers. Die bekende Libertas-koor olv Johan de Villiers kom lewer ’n uitvoering van Bach se Mis in b mineur hier in Toringkerk, op Sondag 5 September om 16:00. ’n Volle orkes en puik soliste sal die uitvoering onvergeetlik maak.
As jy ’n aanhanger van die Libertaskoor is, en ’n liefhebber is van koormusiek en JS Bach (daar is mense wat sê Bach is die grootste komponis van alle tye), is hierdie ’n datum wat jy nou al moet aanteken.

In hierdie kwartaal se kleingroepprogram (en dus ook in die eredienste) kyk ons na ’n aantal kontensieuse sake (“issues”). As daar ’n bepaalde saak is waaroor jy graag groter duidelikheid wil hê, laat ons asb weet. Skryf dit sommer op ’n briefie en gooi dit in die offergawesakkie in. Jy sal ons baie help. Jaco 084 5231157& Christo 084 4900923.

Gesamentlike Nagmaal van NG Kerk en Anglikaanse kerk in Toringkerk. Ons nooi alle lidmate na hierdie baie besondere geleentheid, waar ons (NG) lidmate en die Anglikaanse gemeentelede saam nagmaal vier. Vanjaar is dit in Toringkerk op Donderdagoggend 19 Augustus om 09:30. Die NG en Anglikaanse predikante gaan gesamentlik die nagmaal bedien en ons eenheid vier. Dit was verlede keer (in die Anglikaanse kerk in Paarl-Oos) ’n baie goeie ervaring vir almal wat daar was. Vir meer inligting, skakel Jaco by 021 8724565.

Die kerkraad is biddend aan die besin oor ’n nuwe samestelling en struktuur wat die kerkraad beter in lyn met veranderde tye en met ons roeping sal bring. Ons het reeds by verlede week se gemeentevergadering daaroor gepraat, en wil by ons kerkraadsvergadering op 20 September beslag aan die beplanning gee. Bid asb saam vir die Here se leiding in hierdie baie belangrike saak.

Wolf doen gereeld uitreike na Madagaskar, waar hy betrokke is by kerkplanting en die opleiding van leraars. Jy kan sy nuutste nuusbrief hier aflaai.

Ons het hierdie kwartaal begin met 'n nuwe soort aanddiens. Ons noem dit Fusion.

Fusion beteken vereniging of samesmelting.
Fusion is ons nuwe aanddiens.
Ons fokus op die vereniging of samesmelting van ons lewens met God.
Die diens bestaan uit twee eenvoudige bewegings: lof en aanbidding en ‘n boodskap.