Dankie vir jou kommentaar, Jeannie.
Ek stem met jou saam dat Jesus nie die wet kom vernietig het nie. Hy het wel vir ons gehelp om nie net klakkeloos die wette te volg nie, maar ook te vra wat God daarmee bedoel het toe Hy die wette ingestel het. Onder andere het Jesus gesê dat die sabbat vir die mens gemaak is, nie die mens vir die sabbat nie. Die sabbat is bedoel as rusdag waarop ons ons verlossing in Christus kan vier, net soos die Jode hulle verlossing uit Egipte op die sabbat gevier het.
Dit lyk vir ons asof Jesus, om die nuwe bedeling wat met sy verlossing op Golgota aangebreek het te onderstreep, 'n nuwe dag vir die kerk gegee het waarop hierdie verlossing gevier kan word. Daarom staan Hy op die Sondag op, en ontmoet Hy sy dissipels daarná telkens op 'n Sondag. Tog het die eerste Christene die sabbat bly vier, maar ook die Sondag as "die dag van die Here" (sy opstandingsdag), maar later opgehou om die sabbat te vier toe die Jode hulle uit die sinagoges geskop het. Dis hoe die Sondag as rusdag ingekom het.
Ek glo nie dit maak regtig saak of jy Saterdag of Sondag rus van jou week se werk en die Here op 'n besondere manier dien en sy verlossing vier nie, solank jy een dag in die week anders deurbring, as feesdag en rusdag vir die Here. Gaan lees gerus ook Gal 4:9-11 en Kol 2:16, waar Paulus redelik negatief is oor gelowiges wat krampagtig aan bepaalde dae vasklou asof ons saligheid daarvan afhang.

Miskien moet ek iets sê oor wat dit beteken as ons bely dat Jesus die wet kom vervul het; ook die vierde gebod oor die Sabbat. Dit is nie met Jesus se koms verander nie. Dit is vervul. Dit beteken daarom nie dat die Sondag in die plek van die Sabbat gekom het nie. In Christus is ál die dae van die week nou Sabbat, oftewel dae waarin ons in ons groot en goeie God se sorg kan rus. Ál die dae is nou heilig, nie net een nie.
Die feit dat ons die Dag van die Here op 'n Sondag herdenk, is ook nie iets wat die kerk uitgedink het nie. Dit het geleidelik so ontwikkel in die vroeë kerk, en ons glo dat dit onder leiding van die Heilige Gees gebeur het, net soos die kanon (watter boeke in die Bybel opgeneem is en watter nie) óók deur die Gees se leiding onstaan het, al word daar nie 'n enkele lysie van Bybelboeke iewers in die Skrif vir ons gegee nie.
Soos die Sabbat in die Ou Testamentiese tyd 'n teken was van die verbond tussen God en die volk Israel, so is die Sondag in die Nuwe Testamentiese tyd die teken van ons verbondenheid aan Christus. Met die nuwe verbond wat Christus bewerk het, het daar nuwe tekens gekom, wat verband hou met die ou tekens, maar tog ook nuwe inhoud gekry het.
Nêrens in die Nuwe Testament staan daar dat ons die Joodse Sabbat moet onderhou nie. Paulus skryf dat as ons nog aan die Ou Testamentiese Sabbat vashou, keer ons terug tot die minderwaardige en armsalige wettiese godsdienstige reëls (Gal 4:9).
Hoop my verduideliking help.

Die hele kwessie van Sondag vs Sabbat word baie mooi en uitvoerig bespreek op 'n wonderlike webwerf wat jy gerus kan gaan besoek, nl. www.bybelkennis.co.za. Ek het eenvoudig op die soekfunksie die woord sabbat ingetik en minstens 6 artikels gekry wat direk op jou vrae antwoord. Gaan loer gerus daar in!

Hallo Renier
Ek dink nie ons gaan ver kom as ons oor die Sondag/sabbat-kwessie redeneer nie. Buitendien is dit, wat my betref, nie ’n wesenlike saak nie.
Ek dink ’n mens kan heelwat verder vorder deur jouself te vra wat die funksie van die wet dan eintlik in ’n Christen se lewe is. Oftewel: hoe gebonde moet ons ons aan die wet (Tien Gebooie by name) ag? Op dié vraag het Paulus ’n baie volledige antwoord in Galasiërs 2:15 en verder (eintlik gaan die hele brief oor die vraag wat die wet vir ons beteken). Kortliks kom sy antwoord daarop neer dat die Wet se tyd eintlik verby is. In 3:24,25 skryf hy bv: "Ons was dus onder die toesig van die wet totdat Christus sou kom sodat ons deur te glo, vrygespreek sou word. Maar nou dat die tyd van die geloof gekom het, staan ons nie meer onder die toesig van die wet nie." En hoor hoe skerp raak hy in 4:9-11: "Maar noudat julle Hom leer ken het, of liewer, noudat Hy julle ken, hoe val julle dan nou weer terug na daardie minderwaardige en armalige wettiese godsdienstige reëls? Wil julle van voor af weer slawe daarvan wees? Julle hou aan om besondere dae en maande, feesgeleenthede en jare te vier. Ek vrees my harde werk aan julle was dalk tevergeefs."
Ek skat dié gedeelte antwoord jou stelling dat daar geen opdrag in die Bybel is dat ons die sabbat moet los nie.
Soos ek dit verstaan, is die wet, oftewel die Tien Gebooie, steeds vir my ’n riglyn oor hoe God oor ons lewe voor Hom en met mekaar dink. Daarom bly die Tien Gebooie vir my belangrik, ook die 4e gebod, nl. dat een dag in die week anders as die ander dae is, ’n dag om my verlossing in Christus te vier en om te rus van my arbeid deur te breek met dit wat my deur die week vasvang en moeg maak. Die wet bly dus staan, maar sy karakter verander.
Groete
Jaco